Berikut isi pidato Bupati Harda Kiswaya di Malam Tirakatan Hari Jadi Ke-109 Kabupaten Sleman 2025:
Gumolong Hanggayuh Mukti
Puji syukur konjuk dumateng ngarsanipun Gusti Allah ingkang Maha Welas Asih, ingkang tansah paring kawilujengan, katentreman lan kabagas-warasan dhumateng kula lan panjenengan sedaya.
Wusana ndayani kula lan panjenengan saged rawuh lan silaturahmi wonten ing adicara Tirakatan Pengetan Dinten Ridumadosipun Kaping Satus Sanga Kabupaten Sleman ing ndalu menika.
Ing wekdal meniko kulo ngaturaken agunging panuwun dhumateng sedaya panitia ingkang sampun mbudidaya amrih reroncening adicara Pengetan Dinten Ridumadosipun Kaping Satus Sanga Kabupaten Sleman menika saged lumampah kanthi regeng lan sae.
Tirakatan ing ndalu menika mboten namung adicara tradisi ingkang dipun wontenaken saben pengetan ridumadosipun Kabupaten Sleman, namung dados srana kagem kula panjenengan sami ngaturaken panuwun dhumateng Gusti Ingkang Maha Welas Asih ingkang sampun paring kanugrahan ingkang awujud rezeki ingkang mbanyu mili, kaslametan, lan rahmat dhateng kita sedaya.
Kanthi tirakatan menika kula lan panjenengan sedaya dipun ajab tansah emut dhumateng sangkan paraning dumadi, inggih menika Gusti Allah ingkang Maha Agung.
Sagung para rawuh ingkang kinurmatan.
Tirakatan ingkang kita tindakaken wonten ing dalu punika, sanadyan prasaja, nanging ngemu suraos lan pitutur ingkang lebet.
Injih menika minangka wujud rasa syukur dhumateng Pangeran Ingkang Maha Kuwaos, awwit paringipun berkah satemah Kabupaten Sleman ing titiwanci menika ngancik yuswa ingkang kaping satus sanga.
Pramila saking menika, ing adicara tirakatan menika, kula lan panjenengan caos atur donga pamuji dhumateng Gusti kagem para leluhur kita ingkang sampun berjuang kagem kemajenganipun Kabupaten Sleman.
Lampah tirakat menika ugi dados srana nglelimbang dateng diri pribadi kita sedaya satemah saged dados pribadi ingkang langkung sae, makarya kanthi greget, disiplin, jujur lan sae.
Ing pengetan kaping satus sanga ridumadosipun Kabupaten Sleman menika, kula ugi nggadhahi pangajab bilih sedaya pangarsaning praja saha sedaya masyarakat Sleman saget nyawiji, golong gilig, lan guyub rukun, makarya kanthi semangat gotong royong mujudaken Sleman ingkang majeng, adil, makmur, lestantun dan berkeadaban.
Menika jumbuh kaliyan irahirahan ing pengetan kaping satus sanga ridumadosipun Kabupaten Sleman warsa kalih ewu selangkung inggih menika “Gumolong Hanggayuh Mukti”.
Irah-irahan menika nggadhahi teges bilih sedaya punggawa paprentahan ing Kabupaten Sleman lan warga Sleman kedah mboten kendhat anggenipun makarya nggayuh gesang ingkang langkung sae ing wekdal sak mangke.
Pramila kula lan panjenengan sedaya sumangga sami makaryo kanthi greget ingkang makantar-kantar kangge gesang lan panggesangan kita ingkang langkung sae, ugi kagem Kabupaten Sleman, bangsa lan nagari kita Indonesia.
Mekaten ingkang saged kula aturaken ing wekdal Menika. Ing wasana mugi Gusti Ingkang Maha Asih tansah paring sih nugraha ingkang ndayani katentreman lan karaharjaning Kabupaten Sleman.
Maturnuwun.
Dirgahayu Kabupaten Sleman.
